CHINWAG

O elevado grado de dixitalización, o mapa curricular elaborado polos propios docentes, a ausencia de deberes e a atención persoal ás necesidades e características de cada discente son pilares que constrúen un proxecto sen dúbida revolucionario en comparación coas tradicionais escolas. Neste escenario, a materia de inglés podería beneficiarse claramente do uso de infinitos recursos interactivos en liña e da progresión individualizada do alumnado. Mais se cadra, este alto grado de individualización que caracteriza o Colexio Santa María la Blanca pode desembocar nunha potencial atomización do alumnado. Dende o meu punto de vista, vivimos inmersos nun sistema que promove e premia o egoísmo. Neste sentido, penso que as escolas deben contribuír a corrixir os desequilibrios naturais do sistema, exercendo de axentes de socialización e promovendo aqueles valores relacionados co traballo en equipo, a solidariedade ou o altruísmo.